انا طول عمرى طولى كان مناسب لوزنى لغاية ما وصلت ثانوية عامة و عينك ما تشوف الا النور كنت باخد دروسى فى البيت و اكل ليل نهار لغاية ما بقيت شوال و جيت بعد السنتين بتوع ثانوية عامة وصلت ل 112 كيلو
وضعى وقتها كان مأساوى .. داخل جامعة و خاصة كمان مش لاقى لبس فى المحلات و بروح محلات مقاسات خاصة و تخين تخن السنين و شكلى كان وحش جدا ... قعدت اول سنة جامعة اكل بشراهة جدا لانى كنت مغترب و باكل 5 وجبات فى اليوم و 5 وجبات عمالقة بطاطس و نشويات و دهون و مياه غازية و حاجة لوز العنب وصلت بقى بعدها لقمة وزنى و هى 122 كيلو طبعا كنت مهما اروح جيم او اخس اى شوية بوظان كانوا بيرجعونى تانى لغاية ما يأست فعلا انى ممكن اخس فى يوم من الايام
و جاءت اللحظة الفارقة .. فى تانية جامعة واحد صاحبى قالى ما تجرب تخس لان انت كدا هيجيلك امراض من التخن .. وقتها طبعا كان ردى المعتاد .. انا عمرى ما هخس خلاص .. قالى طب جرب بس .. قالى افطر فطار معقول .. و الغدا نص رغيف عيش مع ربع فرخة و بلاش تتعشى و شوف نفسك
و الله قلت وقتها مش مشكلة .. الدافع اللى خلانى افكر كدا اكتر و احاول .. هى انى كنت بحب بنت و كانت رفضانى و كنت فاكر ان شكلى سبب من اسباب الرفض .. ف قررت اجرب و اشوف ...
قعدت شهر كامل ماشى على النظام لغاية ما فوجئت انى خسيت 10 كيلو فى الشهر مع انى مكنتش ملتزم اوى
كل الناس بدات تشجعنى و تقولى بان عليك تغيير و بقيت بشترى لبس اينعم كان لسه مقاسات كبيرة بس حسيت بفرق و كله بدا يشجعنى
جيت تالتة جامعة كان عندى شقة قدام سيتى ستارز .. و كنت قاعد فيها لواحدى و بالرغم من المغريات الكتير قررت انى اكمل مسيرة ال 10 كيلو
طبعا فى الاجازة بين تانية و تالتة كنت ملخبط اكل بس نزلت جيم و اينعم مخستش بس مزدتش وزن
بدات تالتة و انا عازم على الدايت بس وقعت فى فخ .. انى فكرت انى لما احرم نفسى من الاكل هخس .. طبعا بدات الدايت و كنت بلخبط كل فين و فين .. و الترم الاول عدى كويس و جبت امتياز مع الدايت لانى كنت منتظم .. الترم التانى كنت مندفع انى اخس اكتر لانى وصلت ل 95 كيلو و كله شجعنى انى استمر و وجودى لواحدى خلانى اتشجع انى اكمل لان لو حد معايا هيخلينى البخ فى الاكل ... المهم جيت الترم التانى كنت بحرم نفسى من الاكل مع الدايت لكن النتيجة انى كنت على شفا السقوط فى مادة لانى مع انى كنت مخلصها مذاكرة .. مقدرتش افتكر حاجة فى الامتحان
جيت وقتها عرفت انى غلطان .. بس لما رجعت بيتنا كله قالى انت ما شاء الله خسيت جدا و بقيت 82 كيلو .. طبعا فرق شاسع كان 40 كيلو و قررت انى اشترى لبس و كنت فرحان و تشجيع الناس كان سبب سعادتى .. بس طبعا مش عايز اقول على الترهل اللى كان عندى بس كان معقول لانى خسيت عادى لكن فيه ناس معايا نزلت بسرعة اوى بس الترهلات تحسسك انه لسه تخين و جداااااااااااا كمان
بدات سنة رابعة و عارف ان الاكل الكويس هو السبيل انى اقدر اجيب تقديرات عالية .. قعدت سنة رابعة كلها باكل كويس بس باخد بالى من الاكل و كدا و ماشى على سطر و اسيب سطر لغاية ما خلصت السنة و انا 88 كيلو
طبعا كان احباط ليا انى ازيد بس 6 كيلو فى 10 شهور.. لغاية ما بدات ابص لنفسى و ابص لزمايلى و كله جسمه مشدود و مفيش ترهل و حاسس انى لسه محتاج اخس ... المهم حصلت هنا الكارثة اللى دفعتنى للنزول الكبير
نقلنا فى الاجازة لبورسعيد و كان عمارة عائلية و مكنش ليا هناك اصحاب
شهور اجازة مع اكل بغباوة وصلت ل 95 كيلو جرام على اخر الاجازة .. وقتها دق ناقوس الخطر بالنسبة لى .. و خفت انى اخلاص على حافة الانهيار و الرجوع تانى لنقطة الصفر .. بعد ما بقيت بلبس اللى عايزه
و بدات مرحلة التنحيف
بدات سنة خامسة جامعة وانا عايز اخس و قررت انى اعمل الدايت اللى هقولكم عليه دا
الفطار : رغيف عيش سن و بياض بضتين و جبنة قريش و زبادى خالى الدسم
الغدا : سلطة و ربع فرخة او لحمة او تونة من غير عيش
العشاء : نفس الفطار بس من غير بيض
كنت بشرب 5 فتل شاى اخضر مرة واحدة بدل ما اشرب على 5 مرات
وجبة واحدة يوم الجمعة فرى اللى هى الغدا طبعا
واحد صاحبى فضل طول عمره تخين و كان هيموت و يخس و جه نزل مرة واحدة .. ف دا شجعنى انى هقدر انزل
قعدت شهر كدا فى الاول و منزلتش قد كدا .. قلت هنزل جيم العب حديد .. الكابتن قالى انت بوزنك و الدهون دى مش هيظهر عليك حاجة
انزل لغاية 80 كيلو و انت هيبان عليك بعدها .. طبعا كنت هتجنن بالبادى بيلدنج و الاجسام المشدودة و اللبس الضيق اللى بيبين العضلات
بدات الدايت من تانى شهر و هدفى هو 80 كيلو
بدات الدايت و فضلت مستمر عليه طول الترم وصلت لغاية 79 قلت هبطل .. واحد صاحبى نصحنى انى انزل كمان كام كيلو يبقوا زى صمام امان ليا .. لو وزنى زاد ابقى لسه فى الامان و اقدر اخد بالى .. و سمعت كلامه .. خلصت الامتحانات و انا بالظبط 75 كيلو جرام .. طبعا خسيت جداااااااااااا و شكلى كان متغير اوى و لبسى واسع جدااااااااا و كل الناس فيه اللى شجعنى و فيه اللى قالى شكلى بقى وحش .. طبعا انا كنت مبسوط لان بالحسابات دا وزنى المثالى .. طبعا انا طول الترم اوقات كنت ببوظ الدايت و باكل بره يعنى مكنتش حارم نفسى اوى .. بس عارف انى لو لخبطت النهاردة لازم انتظم .. قعدت اجازة نص السنة فى الاول باكل كتيييييييييير و خفت انى ازيد .. ف حاولت التزم و نزلت ل 72 .. بدا الترم التانى الجامعى طبعا جبت لبس جديد كتيييييير و شكلى كان احسن كتير و كله شجعنى و مدحنى على ارادتى .. و كنت مبسوط جدا بنفسى .. فضلت طول الترم بحاول اثبت وزنى .. انى افطر اى حاجة تيجى فى بالى .. و الغدا معقول شوية و العشا زبادى خالى الدسم .. و فضلت كدا لغاية ما كملت السنة على خير و كنت باكل طول الترم كل اللى نفسى فيه بس المحصلة انى وصلت ل 70 كيلو جرام و الحمد لله
و ها انا مستمر على نفس الوزن و باكل كويس جدا
طبعا علشان الترهل و كدا كنت بلعب ضغط و عقلة
مكنتش بعرف العب ضغطة واحدة .. لما خسيت جسمى خف و ايدى شالت جسمى و عصبى بقى قوى
حاليا بجيب 30 ضغطة متواصلة و 10 عقلة متواصلة .. و كل دا من غير ما العب حديد
حقيقى شعور تانى ما تكون تخين و حاسس ان فيه عقبات كتير و تخس و تحس انك ارتحت و خفيت و بقيت تقدر تعمل اى حاجة
تلعب و تنطط .. كفاية احساسى انى لما ادخل اى محل بلبس اللى نفسى فيه و بلبس
medium و اوقات small
صدقونى .. هتتغيروا من الخارج و من الداخل ارادتكم هتبقى قوية جدا .. انجاز ملوش مثيل
و ربنا يوفقكم يا رب و تخسوا كدا .. خسوا تصحوا :)
